Los centros sociales d’Uviéu entamen rutes y actividaes al aire llibre pa promover una vida activa y en contautu cola naturaleza
Los centros sociales d’Uviéu sacaron alantre un programa de rutes y actividaes al aire llibre pa convidar a la ciudadanía a redescubrir el territoriu dende una perspeutiva saludable, participativa y abierta a toles edaes. Paseos guiaos, salíes en grupu y propuestes na redolada natural formen parte d’esta iniciativa, que busca fomentar vezos de vida activa y reforciar el venceyu col paisaxe cercanu.
Caminar, compartir tiempu al aire llibre y caltener una rutina activa non solo meyora la condición física, sinón que tamién contribuye al bientar emocional y a la creación de redes sociales, aspeutos cada vez más valoraos nes polítiques culturales. Estes actividaes convierten los espacios naturales en llugares d’alcuentru, deprendimientu y convivencia.
Ún de los elementos destacaos del programa ye’l so enfoque interxeneracional. Munches de les rutes tán pensaes pa que participen xuntes persones mayores, families, mozos y neños y neñes, xenerando esperiencies compartíes que fortalecen los llazos ente xeneraciones. El contautu tempranu cola naturaleza, amás, favorez na infancia’l desendolcu d’una mayor conciencia ambiental y un venceyu más cercanu col entornu.
Esta manera d’entender la cultura —como una esperiencia cotidiana, accesible y coneutada cola vida de les persones— ta en total sintonía colos valores que promueve la candidatura d’Uviéu a Capital Europea de la Cultura 2031. El proyeutu defende una cultura que contribuye al bientar, que fomenta la participación y que reconoz el territoriu como un espaciu vivu, onde patrimoniu, paisaxe y comunidá tán mecíos.
Les rutes y actividaes entamaes dende los centros sociales son un exemplu de cómo la cultura pue integrase na vida diaria, promover vezos saludables y fortalecer la cohesión social, al tiempu que convida a mirar la rodiada con otros güeyos y a disfrutala de manera coleutiva.
