Uviéu da’l pistoletazu de salida a SACO con más de 600 escolares nel Teatru Filarmónica

El Teatru Filarmónica entama güei con fuercia una nueva edición de SACO –Selmana del Audiovisual Contemporaneu d’Uviéu–, xuntando a más de 600 neños, neñes y profesoráu de centros educativos de la ciudá na so xornada inaugural.

L’entamu d’esta cita cultural nun solo marca l’aniciu de la programación, sinón tamién el d’una esperiencia compartida que, nes próximes selmanes, averará’l cine y l’audiovisual contemporaneu a más de 8.000 alumnos y alumnes de colexos d’Uviéu.

Mientres la presentación, representantes institucionales y culturales destacaron la dimensión educativa del proyectu. Lourdes García, conceyala d’Educación del Conceyu d’Uviéu; Sabrina Clemente, directora de l’Alianza Francesa d’Uviéu; y Zoe López, coordinadora territorial de la candidatura Uviéu 2031, acompañaron esti entamu que pon el focu nel públicu más mozu.

Zoe López sorrayó que “el públicu infantil ye la futura audiencia del proyectu Uviéu 2031” y destacó que “la educación, la participación y el voluntariáu son facetes mui importantes d’una candidatura a Capital Europea de la Cultura”.

Amás, señaló que “vamos potenciar programes como SACO y munchos otros que representen la vitalidá cultural d’Uviéu, partiendo del talentu que avera la cultura a tolos públicos”, incidendo na importancia d’“una visión interxeneracional como exa estratéxicu del proyectu”.

Hasta’l próximu 8 de mayu, el Teatru Filarmónica acoyerá un total de 22 sesiones dirixíes al públicu escolar, consolidando a SACO como una de les propuestes culturales y educatives más relevantes del calendariu local.