Faise públicu l’informe européu sobre les ciudaes candidates a Capital Europea de la Cultura 2031, con recomendaciones pa la siguiente fase

El panel d’espertos independientes de la Xunión Europea fixo públicu l’informe correspondiente a la fase de preseleición de la Capital Europea de la Cultura 2031 n’España, nel que se recueyen les valoraciones sobre les ciudaes candidates y s’establecen orientaciones de cara a la siguiente fase del procesu.

Nesti documentu, el xuráu confirma la seleición d’Uviéu como una de les cuatro ciudaes finalistes, xunto con Cáceres, Granada y Las Palmas de Gran Canaria, que pasen asina a la fase decisiva. La candidatura uvieína, articulada alredor del conceutu d’Amabilidá, foi reconocida como una propuesta sólida, con una visión contemporánea y coneutada colos grandes retos europeos.

L’informe destaca especialmente l’arraigu territorial del proyeutu, el so calter participativu —cola implicación de más de 1.000 persones— y la so estensión a los 78 conceyos d’Asturies, asina como la so capacidá p’activar redes culturales en tol territoriu y fortalecer el venceyu ente’l mediu urbanu y rural. Amás, el panel pon en valor la calidá y diversidá del programa cultural, qu’abarca distintes disciplines y combina creación contemporánea, patrimoniu, anovamientu y participación ciudadana.

Tamién se sorraya’l potencial tresformador de proyeutos estratéxicos como la recuperación de l’antigua fábrica d’armes de La Vega como gran polu cultural, xunto col ampliu sofitu institucional y social qu’acompaña a la candidatura, col compromisu conxuntu del Conceyu d’Uviéu, el Gobiernu del Principáu y el conxuntu del territoriu asturianu.

L’informe incluye amás una serie de recomendaciones que van sirvir pa siguir reforzando la propuesta de cara a la fase final, afitando la so ambición, la so dimensión europea y la so capacidá d’impautu a llargu plazu, especialmente n’ámbitos como la cooperación internacional, la proyeición esterior y la conexón con nuevos públicos.

Les cuatro ciudaes finalistes tendrán que presentar a finales d’añu un nuevu dosier revisáu enantes de la decisión definitiva, prevista p’avientu de 2026. Uviéu sigue asina avanzando nun procesu que sitúa la cultura nel centru como motor de tresformación, cohesión social y proyeición internacional.

Llei equí l’informe https://www.cultura.gob.es/dam/jcr:3ab0c903-651d-4c11-8cd3-6db5836ddf37/spain-2031-preselection-report-13-04-2026.pdf