Uviéu 2031 aborda l’accesibilidá y los cuidaos na so segunda mesa de participación

La sala Jaime Herrero del Institutu Asturianu de la Mocedá acoyó esti martes la segunda mesa de participación entamada pola candidatura d’Uviéu a Capital Europea de la Cultura en 2031. La sesión tuvo dedicada a reflexonar sobre cultura, accesibilidá y cuidaos, trés ámbitos clave pa construyir una candidatura abierta, inclusiva y coneutada coles necesidaes reales de la ciudadanía.

L’alcuentru forma parte del procesu d’escucha y participación impulsáu por Uviéu 2031 durante’l mes de xunetu, col oxetivu d’incorporar miraes diverses al segundu dosier de candidatura. Al traviés d’estes meses, el proyeutu busca xenerar un espaciu de diálogu con profesionales, entidaes, colectivos y persones venceyaes a distintos ámbitos culturales y sociales.

Durante la sesión abordáronse cuestiones rellacionaes col accesu a la cultura, la eliminación de barreres físiques, cognitives y sociales, y la importancia de poner los cuidaos nel centru de les polítiques culturales. Les persones participantes compartieron esperiencies, necesidaes y propuestes p’avanzar hacia una programación más accesible, diversa y sensible a les distintes formes de participar na vida cultural.

Esta mesa conviértese na segunda sesión celebrada esta selmana y forma parte del calendariu d’alcuentros sectoriales col que Uviéu 2031 sigue trabayando na definición d’una candidatura construyida dende la participación ciudadana.

Con estes sesiones, Uviéu 2031 refuerza’l so compromisu con una cultura entendida como ferramienta de convivencia, inclusión y bienestar colectivu.