Oviedo 2031 mira a Europa pa imaxinar el futuru cultural de La Vega
Más d’un centenar de profesionales de la cultura axuntáronse’l 12 de payares na antigua Fábrica de Armas de La Vega pa compartir esperiencies de recuperación del patrimoniu industrial y aldericar sobre’l futuru del recintu. Periscopio Oviedo, organizáu por Oviedo 2031 y Fundación Contemporánea, reunió a representantes de centros culturales europeos, especialistas en patrimoniu y profesionales de la cultura d’Uviéu.
Con cerca de 120.000 metros cuadraos nel corazón de la ciudá, La Vega ye ún de los espacios clave de la candidatura d’Uviéu a Capital Europea de la Cultura 2031. La so recuperación permitiría conservar la memoria industrial del recintu y abrilo a la creación artística, la programación cultural y la participación ciudadana.
La xornada permitió conocer de primera mano cómo otros centros europeos dieron usos nuevos a los sos espacios. Ente los casos presentaos tuvieron Fabra i Coats, una antigua fábrica testil de Barcelona convertida en centru de creación artística, y DEPO2015, que tresformó una antigua cochera d’autobuses de Pilsen nun espaciu cultural y creativu. Tamién se compartieron les esperiencies de Poligon, en Liubliana, y PACT Zollverein, en Essen. Representantes de la rede Trans Europe Halles, de la Fundación Ciudad de la Energía (CIUDEN) y especialistas en patrimoniu apurrieron distintos puntos de vista sobre cómo combinar la conservación de los edificios con una programación que los mantenga vivos y conectaos cola so redolada.
«Creemos que esti alcuentru refuerza la nuestra apuesta por recuperar la Fábrica de La Vega, unes instalaciones qu’impresionaron a tolos ponentes», señaló Rodolfo Sánchez Farpón, director d’Oviedo 2031.
Los profesionales de la cultura d’Uviéu tamién pudieron plantegar les sos idees sobre qué facer en La Vega. Na sesión «Siéntate a la mesa», los participantes compartieron les sos propuestes con Zoe López Mediero, codirectora artística d’Oviedo 2031, y Marcella Ciacci, autora de The 99, una guía de centros d’arte de referencia en tol mundu.
Periscopio celebróse na recta final de la candidatura, depués de la entrega del dosier definitivu’l 3 de payares col lema Amabilidá. Escoyer la utopía. El xuráu européu va visitar Uviéu’l 27 de payares y la ciudá va defender el so proyectu en Madrid el 1 d’avientu. La decisión va anunciase’l 3 d’avientu.

