Uviéu impulsa una gran Marcha pola Amabilidá con cerca de 2.500 escolinos y escolines
Más de 30 centros educativos, artistes, families y centros sociales van participar esti vienres nuna gran acción ciudadana vinculada al Día d’Europa y a la candidatura d’Uviéu a Capital Europea de la Cultura 2031.
Uviéu va celebrar esti vienres 8 de mayu la Marcha pola Amabilidá, una de les grandes acciones participatives impulsaes pola candidatura d’Uviéu a Capital Europea de la Cultura 2031. La iniciativa va axuntar a cerca de 2.500 neños y neñes de 32 centros educativos de la ciudá nuna movilización creativa que va enllenar les cais de música, color ya imaxinación.
La Amabilidá ye ún de los conceptos centrales de la candidatura, entendíu como una forma de promover la convivencia, el respetu, el cuidu y la cooperación al traviés de la cultura. “Más de 30 colexos d’Uviéu van participar na marcha. Los neños y neñes tuvieron trabayando con 25 artistes y preparando tolos elementos pa defender el relatu de la Amabilidá como respuesta a los problemes qu’esisten nel mundu”, esplica Rodolfo Sánchez, director de la candidatura.
L’actividá supón amás la primer acción de les residencies artístiques en colexos recoyíes nel Plan Estratéxicu de Cultura d’Uviéu, PECO 2035. Mientres selmanes, l’alumnáu trabayó xunto a artistes de disciplines como danza, música, teatru, circu, artes plástiques o reciclaxe pa crear pancartes, canciones, vistuariu, instrumentos y pequeñes acciones colectives que van formar parte del percorríu.
“Los colexos son mui importantes pa la candidatura. Na marcha va haber estudiantes, profesoráu, artistes y families, toes xuntes nesti camín”, señala Paula García Mota, codirectora artística d’Uviéu 2031. Pela so parte, Zoe López Mediero destaca que “esti ye un camín que empieza agora y nel que vamos implicar a tola comunidá educativa pa construyir xuntos esti proyectu de candidatura”.
La xornada va entamar na Plaza de la Catedral y va rematar na antigua Fábrica d’Armes de La Vega, que se va tresformar simbólicamente nuna Fábrica d’Amabilidá: un espaciu pa la imaxinación, el xuegu y la creación compartida.
Ellí van desarrollase distintes propuestes artístiques y participatives con teatru, circu, música, maxa, instalaciones y xuegos colectivos, de la mano de compañíes y artistes como Higiénico Papel, Mar Roxu Teatru, Hipnótica Circo Teatro, Adrián Conde o la compañía francesa Le Piano du Lac.
La Marcha pola Amabilidá marca amás l’entamu d’un procesu más ampliu de participación infantil y adolescente dientro de la candidatura d’Uviéu 2031, con nueves acciones previstes nos centros educativos mientres el próximu cursu.
